Sri Musdikawati: Basa Mandar diq e diteq e parallui dipiara anna dijagai tettongan

MAMUJU – Naiyya basa Mandar diq e diteq e parallui dipiara anna dijagai tettongan, sabaq melimbumi basana tau laeng iya pole issung di banua laeng, apaq iyapa nasanga nanaeke diteq e modoreng muaq maqbasa asingmi. Naiya naanggaq maccappuq I basa daerah tettopa basa Mandar iamo diq e digena maqrupa-rupa basa (keberagaman) dini di Indonesia.

Nadipasituruqmi data BPJS taung 2011, iya ticataq nadiang 79, 5 paraseng pappake basa daerah dini di Indonesia iya di lalang ruang boyang. Muaq nauwwangi diq e jumallana namenjadi naterancammi basa daerah.

Nanauwwa tomi basa daerah Mandar, titulis dio di penelitianna Rabiatul Adawiah anna Sri Musdikawati judulna “Language Situation of Mandarese as Local Language in Family Domain of Polewali Mandar Regency (2016: 106).

Ia paqbasa Mandar ingganna dami 27, 5 % (duappitupulo paraseng). Jadi, seharusnami diperhatikang nasang, anna mala andiangi di lalanna basa daerah ia na sisaicco terancangi nacappuq tomappake.

“Parallu niaq macoa anna perhatiang pole itaq iyanasangna nadibantumi mappasalamaq basa Mandar” nauwwang pemerhati pendidikang Dr. Sri Musdikawati, M.Si lao di Mandarnesia.com, Sattu (26/11/2017).

Nauwwa dottor iya tamma dio di Universitas Negeri Makassar (UNM), diq e, nadiang saapa passal iya naanggaq namappacappuq basa daerah di Mandar. Iamo. Mammesana, diang dua tau andiang kaiyyang nyawana annaq masiriq I maqbasa Mandar.

Madaqduana, diang toi tia To mabubeng andiang massio anaqna mappake basa Mandar di lalang ruang boyanna, jadi andiangi napobiasa anaqna. Mattallunna, di wattu diteq e di era global maiqdi tau nalaqbirang maqbasa asing anna iya maqbasa Mandar. Paccappuranna, pamaretta andiang toi massio mappake basa Mandar mau di lalang pamaretta nauwwa topa di lalang passikolangang.

“Maeqdi tau maanggaq I andiangmmi parallu tau maqbasa Mandar , annaq maeqdi toi To Mangura dua andiangngi nasaqding napoqmaqgia maqbasa Mandar, namaumi, menuruq hasil peitaaq u, tonganna maeqdi passikola wattu dipatuleq I paralludi atau andiang maqbasa Mandar? Nabalimi saq parallu sannaq I” Ia napaquangang.

Cara maantisipasi diq e keadaange nauwwa Sri, parallui dipettamai dipatama di lino pipatudu malai dipajadi muatan lokal atau laenna.

Cara laenna dipipissangangi anna dipiillongani dio di media.

#AyubKalapadang
Translate: DR. Sri Musdikawati

Foto: twitter.com